Koreja e Jugut kryeson listën e shteteve nga ku Shqipëria importoi automjete përgjatë këtij viti. Të dhënat e Drejtorisë së Përgjithshme të Shërbimeve të Transportit Rrugor, flasin për një total prej më shumë se 30 mijë mjetesh të regjistruara për herë të parë në Shqipëri nga muaji janar deri në prill të këtij viti. Më shumë se 7 mijë prej tyre janë importuar nga Koreja e Jugut. Pas saj vjen Kina me rreth 5600 automjete. Pra rreth 40 për qind e mjeteve të regjistruara kanë si vend origjine vendet aziatike. Pas tyre vjen, Gjermania, Italia dhe Shtetet e Bashkuara të Amerikës. Kategorizuar sipas lëndëve djegëse, bie në sy fakti se vijojnë të kryesojnë mjetet me naftë, pasi më shumë se 16 mijë mjetet të regjistruara për herë të parë këtë vit funksionojnë me naftë. Ndërkohë më shumë se 7 mijë autovetura dhe motora të regjistruar në harkun kohor të katër muajve të parë të vitit janë me benzinë. Megjithatë, vihet re se mjetet elektrike po njohin gjithnjë e më shumë një trajektore rritëse. Në total në katër muaj, janë regjistruar 4155 mjete elektrike në Shqipëri, pjesa më e madhe e tyre nga kompania BYD dhe Volksëagen. Për shkak edhe të shpërndarjes së popullsisë, pjesa më e madhe e mjeteve janë regjistruar në Tiranë, rreth 13 mijë e 100 të tilla, pasuar nga Durrësi me rreth 4900 mjete të reja, Fieri, Elbasani dhe Shkodra.