Në Ditën e Europës, Presidenti i Këshillit të Europës, Antonio Costa përcolli një mesazh për qytetarët shqiptarë, si anëtarë të ardhshëm të unionit europian. “Të dashur qytetarë të Shqipërisë, po ju drejtohem sot si anëtarë të ardhshëm të Bashkimit Evropian. Në Ditën e Europës, ne festojmë projektin tonë të përbashkët europian, kur anëtarët tanë themelues zgjodhën unitetin mbi përçarjen dhe bashkëpunimin mbi konfliktin. Ata vendosën të ndërtonin një të ardhme paqeje, lirie dhe prosperiteti mbi rrënojat e Luftës së Dytë Botërore. Ne besojmë se e ardhmja juaj është në Bashkimin Evropian. Po bëhet shumë punë e madhe për ta bërë këtë realitet. Shqipëria ka shënuar përparim të konsiderueshëm në negociata gjatë vitit të fundit. Ju inkurajoj të vazhdoni me ritmin e reformave. Së bashku, do të ndërtojmë një të ardhme të përbashkët europiane. Rroftë Europa!” Presidenti i Republikës, Bajram Begaj u shpreh se në këtë ditë vlerësohen të gjithë ata, të cilët bënë realitet projektin e Bashkimit Europian, që ka në zemër paqen, sigurinë, demokracinë, solidaritetin dhe lirinë. Kreu i Shtetit nënvizoi se Shqipëria është më afër se kurrë për të qënë pjesë e familjes europiane. Kryeministri Edi Rama e përshëndeti këtë ditë me një fotografi të shkrepur nëntorin e vitit të kaluar, ku përkrah komisioneres europiane të zgjerimit, Marta Kos festohej çelja e të gjithë grupkapitujve të negociatave të Shqipërisë me unionin europian. Shefi i diplomacisë, Ferit Hoxha nënvizoi se për Shqipërinë, Europa nuk është thjesht një destinacion, por një zgjedhje vlerash dhe përgjegjësie të përbashkët për një të ardhme më të mirë.