Forcat ‘Shqiponja’ në bashkëpunim me shërbimet e Komisariatit të Policisë Nr. 1, finalizuan operacionin e koduar “Pasagjeri”, duke vënë në pranga një 31-vjeçar, pas informacionit të siguaruar se ai lëvizte I armatosur. Duke e cilësuar si një rrezik potencial për ngjarje kriminale, Policia njofton se është arrestuar në bulevardin “Zhan D’ark”, teksa udhëtonte si pasagjer në një automjet tip audi, që drejtohej nga një 51 vjeçar. Nga kontrollet, 31-vjeçarit iu gjet në çantën e dorës, 1 armë zjarri pistoletë me municion, që e posedonte pa leje. Po ashtu, u procedua penalisht drejtuesi i automjetit në të cilin ishte pasagjer shtetasi i armatosur, për moskallëzim të krimit. Materialet procedurale iu referuan Prokurorisë së Tiranës për armëmbajtje pa leje, për veprime të mëtejshme.