Batalioni i tretë i këmbësorisë nga data 15 deri në 17 shtator, zhvilloi stërvitjen 72 orëshe “Shqiponja Paqesore 20”. Kjo stërvitje u krye për të testuar dhe përmirësuar kapacitetet për kryerjen e detyrave në kuadër të operacioneve të mbështetjes së paqes si dhe ruajtjes së gatishmërisë. Stërvitja u zhvillua në nivel kompanie, ku efektivët pjesëmarrës të kompanisë së tretë të batalinonit të këmbësorisë realizuan skenarë të ndryshëm, ditën dhe natën. Trupat testuan aftësitë për krijimin e pikave të kontrollit në mjedise jo të sigurta dhe terren të panjohur, shpërndarjen e turmave në situata të tensionuara, goditjen e objektit, brenda të cilit ka elementë të rrezikshëm, patrullimin si në këmbë dhe me mjete, e deri te bashkëpunimi me pushtetin lokal në zonën e operacionit. Stërvitjet në kuadër të operacioneve të mbështetjes së paqes do të vazhdojnë në brigadën e tretë të këmbësorisë me stërvitjen “Shigjeta 20” e cila do të zhvillohet në muajin tetor.