Gjuha shqipe është gjuhë zyrtare në Maqedoninë e Veriut, shtet ku ndodhet vendlindja e alfabetit tonë. Megjithatë, populli thotë se nga e thëna në të bërë, është në mes një mal i tërë dhe zbatimi i shqipes në të gjitha nivelet e administratës së shtetit maqedonas po has në pengesa. Shqipja u vendos gjuhë zyrtare në Shkup pas Marrëveshjes së Ohrit. Kushtetuta përcakton se gjuhët që fliten nga më shumë se 20 për qind e qytetarëve të Maqedonisë së Veriut është gjuhë zyrtare në vend. Shqiptarët, sipas censit të vitit 2022 përbëjnë 29 për qind të popullsisë prej gati 2 milionë banorësh. Për zbatimin e Kushtetutës u miratuan edhe ligje, që në 2018 përforconte, të paktën juridikisht pozicionin e gjuhës shqipe në administratë. Por, ligji u kundërshtua në atë kohë nga opozita maqedonase, që sot është në pushtet dhe përmes disa nismave në Kushtetuese synon të kufizojë përdorimin e gjuhës shqipe. Qeveria e re e Hristjan Mickoskit akuzohet se po ngre një narrativë të rreme sikur shqiptarët kanë siguruar më shumë të drejta nga sa u takojnë dhe këto të drejta janë marrë edhe në fushën e përdorimit të shqipes si gjuhë zyrtare në të gjithë vendin dhe në të gjitha nivelet e administratës shtetërore. Në bazë të kësaj narrative, ligji për përdorimin e gjuhëve është dërguar për shqyrtim në Gjykatën Kushtetuese. Mickoski vetë mohon akuzat, ndërsa partnerët e tij shqiptarë në koalicionin qeverisës thonë me bindje se gjuha shqipe nuk do të preket.