Largimi i të rinjve është kthyer në fenomen tejet shqetësues për Shqipërinë, pasi sipas të dhënave të Eurostat, vetëm gjatë vitit 2024 emigruan drejt vendeve të Bashkimit Europian rreth 44 mijë shqiptarë. Pas pandemisë, në periudhën 2021–2024, nga vendi janë larguar të paktën 180 mijë persona, pa përfshirë Greqinë dhe Mbretërinë e Bashkuar, teksa grupmosha 25–29 vjeç përbën peshën më të madhe të emigrantëve, i ndjekur nga mosha 30–34 vjeç. Po ashtu vihet re edhe largimi i familjeve të reja me fëmijë, ku grupmosha nën 15 vjeç përbën gati 18% të të larguarve, duke thelluar më tej krizën demografike. Si pasojë e kësaj vale të ndjeshme emigrimi, popullsia shqiptare po plaket me ritme shumë më të shpejta se mesatarja europiane, duke bërë që mosha mesatare të arrijë në 44.3 vjeç në vitin 2025, nga 34.7 vjeç që ishte 10 vite më parë, sipas Revistës Monitor. Shqetësim mbetet dhe rënia e numrit të lindjeve, teksa shifrat tregojnë se nga mbi 82 mijë në fillim të viteve ’90, lindjet kanë rënë në rreth 21 mijë në 2025, një rënie prej 74%. Po ashtu, numri i atyre që largohen vijon të jetë më shumë se dyfishi i atyre që kthehen, duke e vendosur vendin përballë një prej sfidave më të rënda demografike në historinë e tij moderne.