Goditja e tregut të pasurive të paluajtshme në Dubai, si pasojë e tensioneve në Lindjen e Mesme, po krijon mundësi të reja për bregdetin shqiptar, veçanërisht për Vlorën dhe Sarandën. Sipas agjentëve imobiliarë, një pjesë e investitorëve ndërkombëtarë po largohen nga Dubai, ku në disa raste pronat kanë humbur ndjeshëm vlerë, dhe po e shohin Shqipërinë si një alternativë më të sigurt dhe me potencial rritjeje. Sipas revistës Monitor, ekspertët theksojnë se interesi është ende në fazë fillestare, por pritet që kërkesa për vila dhe apartamente në zonat bregdetare të rritet, duke ndikuar gradualisht edhe në çmimet e tregut. Reuters raportoi në mars se sektori po jepte shenjat e para të dobësimit, me volumet e transaksioneve në Emiratet e Bashkuara Arabe që ranë 37% me bazë vjetore. Ndaj, rënia e transaksioneve dhe pasiguritë në Dubai po shtyjnë kapitalin drejt tregjeve të reja, ku riviera shqiptare po fiton gjithnjë e më shumë vëmendje si destinacion investimi.