Vendet e Ballkanit Perëndimor po përpiqen të kalojnë nga industritë tradicionale drejt modelit “Green” dhe digjital, por nga ana tjetër mungojnë standardet dhe investimet në rritjen e aftësive të fuqisë punëtore. Sipas një studimi të Këshillit të Bashkëpunimit Rajonal, performanca industriale në gjashtë vendet e Ballkanit Perëndimor nuk është uniform. Serbia dhe Maqedonia e Veriut janë më të përparuara, Shqipëria, Bosnja dhe Kosova paraqiten me zhvillime më të brishta, ndërsa Mali i Zi ka një bazë më të ngushtë të sektorit të industrisë në ekonomi, shkruan Revista Monitor. Megjithë zhvillimet, kapaciteti industrial i Rajonit të Ballkanit është shumë i vogël krahasuar me BE-në. Në Serbi dhe Maqedoninë e Veriut, të cilat i afrohen më shumë mesatares së BE-së, kapaciteti i eksportit industrial është vetëm rreth një e katërta e atij të BE-së, ndërsa në Shqipëri ai është rreth 98% më i ulët.