Situata e zjarreve vijon të mbetet problematike në disa qarqe të vendit, me 44 vatra të raportuara gjatë 24 orëve të fundit. Sipas Ministrisë së Mbrojtjes, 14 vatra vijojnë të jenë aktive, 9 janë nën mbikëqyrje, ndërsa 21 janë shuar. Në terren janë angazhuar 636 forca vendore dhe 67 mjete zjarrfikëse, ndërsa Forcat e Armatosura kanë mbështetur operacionet me 329 efektivë, helikopterë, një avion Air Tractor dhe një dron. Në Shkodër vijon aktive vatra në aksin Bardhaj-Myselim, ku ndërhyrja po kryhet si nga toka, ashtu edhe nga ajri. Në operacion janë angazhuar 71 efektivë dhe dy helikopterë të Forcave të Armatosura. Në Tiranë, zjarret vijojnë aktive në Malin e Dajtit, Kryezi të Kavajës dhe Selitë e Malit. Në Dajt po ndërhyhet me 82 efektivë dhe një helikopter të Forcave të Armatosura. Në Dibër, aktive janë vatrat në Vajkal, Lundre-Madhesh, Qafën e Helmes dhe Cerrujë. Edhe në Lezhë aktive mbeten zjarret në Gallatë dhe në zonën Kalivaç-Zimaj-Kashnjet, ku janë angazhuar 63 efektivë dhe 2 helikopterë. Në Berat, vijon aktive vatra në Vokopolë, ndërsa zjarri në lagjen Kala është shuar. Në qarqet e tjera të vendit, situata është më e stabilizuar, me disa vatra të shuar dhe të tjera që vijojnë të mbahen nën mbikëqyrje.