Ministri për Europën dhe Punët e Jashtme, Igli Hasani deklaroi se ka nisur puna për hapjen e ambasadës shqiptare në Kiev. Në një deklaratë të përbashkët për media me homologun e tij ukrainas, Dmytro Kuleba ministri Hasani shprehu mbështetjen e Shqipërisë ndaj sovranitetit, lirisë dhe pavarësisë së Ukrainës. Sakaq dënoi me forcë agresionin rus ndaj Ukrainës. ‘Diskutuam për avancimin e marrëdhënieve të mira Shqipëri-Ukrainë. Në fokus të bisedës, ndihma ekonomike që Shqipëria mund të ofrojë për Ukrainën. Kemi diskutuar për mënyrat e rritjes ekonomike. Ukraina është e vendosur që e ardhmja e saj të jetë në krah lirive evropiane. Uroj që ky samit, të jetë frytdhënës dhe të ofroj perspektiva të reja për të ardhmen e Ukrainës.’ Nga ana tjetër homologu Dmytri Kuleba tha se samiti tregon se sa vlerësim ka Shqipëria në rajon. Sot diskutuam bashkëpunimin dypalësh, Shqipëria mike e mirë e Ukrainës, dua ta falenderoj për ndërmarrjen humantiare për rehabilitimin e fëmijëve ukrainas prindërit e të cilëve janë vrarë në luftë. Çdo mbështetje është e vlerësuar.’ Për të marrë pjesë në samitin për Ukrainën dhe Europën Juglindore janë të pranishëm në Tiranë udhëheqësit e gjashtë vendeve të Ballkanit Perëndimor si dhe udhëheqës të vendeve të tjera të Europës Juglindore, duke përfshirë edhe presidentin ukrainas Volodymir Zelenski, i cili vjen për herë të parë në Shqipëri.