Reputacioni i presidentit francez Emmanuel Macron, si njeriu i ideve në kontinent, duket se është zbehur prej kohësh, dhe është zëvendësuar nga një reputacion i ri: shefi i partisë. Ndërsa BE po planifikon qëndrimin përballë krizave ekzistenciale, blloku nuk mund të mbështetet më te idetë e mëdha të Macron, shkruan Politico. Bisedat me diplomatë dhe zyrtarë nga BE, që ruajtën anonimitetin për të diskutuar hapur fatin politik të presidentit francez, sugjerojnë se problemet e brendshme të 47-vjeçarit dhe përqendrimi në trashëgiminë e tij e kanë bërë atë një pengesë për progresin dhe jo një motor të tij. Muri i Dronëve, i propozuar nga presidentja e komisionit evropian, Ursula von der Leyen, për të mbrojtur qiellin evropian nga ndërhyrjet ruse, është një plan jo realist sipas Macron. Ideja e Presidentit të Këshillit Evropian António Costa për të përmirësuar procesin e pranimit në BE duke eliminuar nevojën për unanimitet, nuk është e pranueshme për Macron. Presidenti francez në fakt është parë prej kohësh mbështetës i pranimit të anëtarëve të rinj në BE për të rritur peshën ekonomike dhe gjeopolitike të bllokut. Ai udhëhoqi Komunitetin Politik Evropian si një lloj salle pritjeje për anëtarët që aspirojnë të bëhen anëtarë të BE-së në 2022, dhe një vit më vonë u zotua të sillte vendet kandidate aspirante në bllok sa më "shpejt të jetë e mundur". Por aleatët e tij nuk mundën ta kuptonin vendimin për të kundërshtuar propozimin e Costa-s për të hequr të drejtën e vetos Hungarisë për disa pjesë të procesit të pranimit. Një zyrtar me peshë nga grupi i Macron në Parlamentin Evropian tha se ky veprim ishte "në kundërshtim të plotë" me angazhimet e mëparshme të presidentit. Sipas një aleati të Macron, ai thjesht nuk ka kapitalin politik për të mbështetur disa nga ambiciet e tij, veçanërisht ato që u japin ushqim euroskeptikëve dhe ekstremit të djathtë të Marine Le Pen. "Nuk është momenti i duhur, kemi të djathtën ekstreme mbi shpinë", tha aleati. “Çdo bisedë për hyrjen e Shqipërisë dhe Malit të Zi në BE është një dhuratë për Le Pen”, tha ai. Muajt e fundit, presidenti francez është bërë shumë i kujdesshëm duke kundërshtuar propozimet që rrezikojnë të priten keq në francë dhe akoma më i ashpër në lidhje me propozimet që vetë ai nuk i kontrollon. "Ky Macron është konsumuar nga problemet e brendshme", thotë një diplomat i BE-së. "Ai nuk është më kampioni evropian që njihnim". Dhe diplomatët jashtë Francës tashmë flasin për Macronin në kohën e shkuar edhe pse ai nuk pritet të largohet nga detyra deri në 2027. "Ai ishte diçka e veçantë", tha një prej tyre për POLITICO-n.