Presidenti i Republikës, Bajram Begaj pati një bisedë në linjë telefonike me komandantin e KFOR-it, Ristuçia ku diskutoi lidhur me situatën e tensionuar në veri të Kosovës. Gjatë bisedës kreu i shtetit, Bajram Begaj shprehu mbështetjen e plotë për misionin e KFOR-it dhe aktivitetet e tij dhe u uroi shërim të shpejtë ushtarëve të lënduar në protestat në veri të Kosovës. Më herët, Begaj kërkoi zbatimin e plotë të marrëveshjes së Brukselit dhe Ohrit, që tregon rrugën e duhur të zgjidhjes së problemeve të hapura dhe të normalizimit të marrëdhënieve midis Kosovës dhe Serbisë. Begaj u bëri thirrje publikisht autoriteteve kosovare për më shumë durim e maturi dhe sidomos koordinim të ngushtë me partnerët ndërkombëtarë. Presidenti shtoi se askush nuk mund të vërë në pikëpyetje sovranitetin dhe integritetin e Republikës së Kosovës, si dhe të drejtën e saj për të ndërtuar e konsoliduar institucionet demokratike dhe multietnike.