Gjatë punimeve të Konferencës së Energjisë në Athinë, organizuar nga prestigjozja Financial Times, ministri Enea Karakaçi ftoi homologun e tij grek për të thelluar bashkëpunimin dypalësh në drejtim të bursës shqiptare të energjisë elektrike. “Ftova ministrin grek që të vazhdojë bashkëpunimi përsa i përket dy bursave të energjisë elektrike, ndërmjet bursës shqiptare të energjisë dhe bursës greke të energjisë, që gjatë gjithë këtyre viteve kanë patur një bashkëpunim shumë të mirë përsa i përket operimit të tyre. Këtë e dëshmon edhe fakti që bursa shqiptare e energjisë ka marrë një zhvillim shumë të madh, ku volumet janë shtuar në vitet e fundit, dhe pikërisht ka qenë një nga elementët kryesorë bashkëpunimi edhe me palën greke për t'i dhënë siguri në operim, por edhe në efiçencën e plotë të transaksioneve.”