Sali Berisha thotë se politika e jashtme dhe diplomacia shqiptare ka dështuar dhe sot Shqipëria është e izoluar në rajon. Sinkron Berisha - Sot, Edi Rama foli para diplomatëve të Shqipërisë në një konferencë, që tradicionalisht është konferencë vjetore, por konferenca mblidhet në një moment dështimesh të mëdha të politikës shqiptare. Edi Rama nuk foli një fjalë për marrëdhëniet e ngrira që ka krijuar ai në fqinjin jugor, kryekëput për interesa të tij mafioze të tij personale në trojet dhe brigjet e Bashkisë së Himarës. Edi Rama nuk foli një fjalë për ngrirjen pothuaj de facto të marrëdhënieve me Kosovën, pasi më haptas se sa Aleksandër Vuçiç, Edi Rama shpalli sanksionet ndaj Republikës së Kosovës. Edi Rama ngriu marrëdhëniet në Republikën e Maqedonisë së Veriut, sepse u angazhua direkt në fushatë elektorale në mënyrën më të paskrupullt. Marrëdhënie pothuaj të ngrira janë dhe në Malin e Zi. Arsyeja, sipas Berishës është se sot Tirana zyrtare ndjek interesat mafioze dhe klienteliste. Ai akuzoi Ramën se ka përvetësuar diplomacinë dhe u bëri thirrje ambasadorëve që të qëndrojnë, përfaqësojnë dhe mbrojnë interesat e shqiptarëve dhe jo të Edi Ramës.