Masat e sigurimit personal arrest në burg të shpallura ndaj ish-drejtorit të Autoritetit Rrugor Evis Berberi janë të ligjshme dhe kushtetuese. Ky është vendimi i Gjykatës Kushtetuese që në krye të afro dy viteve mbas prangosjes së funksionarit, deklaroi se Berberi do të vijojë të mbahet në qeli për llogari të SPAK. Kushtetuesja rrëzoi kërkesën e Evis Berberit i cili u ankua për arrestin në burg, të cilën gjykata antikorrupsion dhe më pas të tjerat e shpallën referuar kërkesës së SPAK, i cili e akuzon për abuzime me tenderat. Gjatë procesit në kushtetuese Evis Berberi i shtoi padisë edhe një pretendim të dytë për shqyrtim, duke ngritur shqetësimin për paligjshmëri të këqyrjes së celularit. Por Gjykata Kushtetuese vlerësoi se në këtë pikë, Berberi duhet të ezaurojë si fillim shkallët më të ulëta, çka do të thotë se si fillim ish funksionari duhet ta paraqesë këtë qëndrim në GJKKO. Çështja e telefonit të Berberit për të cilën kushtetuesja nuk u shpreh, do të jetë një kalë beteje edhe për ish zv. kryeministren Belinda Balluku, përderisa emri i ish-zyrtares së lartë përmendet në biseda të ndryshme për tenderat dhe pikërisht nga këto komunikime më pas SPAK mori shkas ta vendosë nën hetim. Aktualisht çështja e masave të sigurisë ndaj deputetes Balluku gjendet në Gjykatën e Lartë ku është rekursuar masa e ndalimit për të dalë jashtë vendit. Veç kësaj avokatët e ish zv.kryeministres Balluku thonë se provat ndaj klientes së tyre duhet të cilësohen të papërdorshme dhe një ndër to edhe provat që i referohen telefonit të Berberit, i cili dyshohet se komunikon për prokurimet edhe me ish funksionaren në hetim prej SPAK.