Shefi i Politikës së Jashtme të Bashkimit Evropian, Josep Borrell, tha të hënën se duhet çuar përpara procesi i negociatave për anëtarësim të Shqipërisë dhe Maqedonisë së Veriut, ndërsa theksoi se nuk ka pasur synim për veçimin e tyre në këtë proces. Zoti Borrell i bëri këto komente pas takimit që zgjati 7 orë mes ministrave të jashtëm të Bashkimit Evropian të cilët diskutuan mes çështjesh tjera, situatën në Ballkanin Perëndimor. Ai tha se ministrat u pajtuan se Ballkani Perëndimor është rajon me rol thelbësor gjeo-strategjik për Bashkimin Evropian dhe ritheksuan ardhmërinë evropiane të gjithë rajonit. “Po kjo nuk ka të bëjë vetë më procesin e zgjerimit, por duam të sigurohemi se jemi politikisht të angazhuar me partnerët tanë që nga trajtimi i pandemisë së COVID-19, vaksinimin, bashkëpunimin ekonomik, trajtimin e ndikimeve të jashtme, mbrojtjen nga dezinformimin etj”, tha ai duke nënvizuar se pati një pajtim të gjerë për nevojën e Ballkanit Perëndimor që të forcojë reformat evropiane. Sipas kryediplomatit te BE procesi i negociatave me Shqipërinë dhe Maqedoninë e veriut duhet të shkojë përpara. “Aasnjëherë nuk ka pasur synim për veçimin e tyre në këtë proces”, tha ai. Javën e kaluar, komisionari për zgjerim, Oliver Varhelyi, la të hapur mundësinë që Shqipëria të veçohet nga Maqedonia e Veriut, apo që e para të nisë negociatat për anëtarësim. Bashkimi Evropian dha dritën jeshile më shumë se një vit më parë, por kundërshtimi i Bulgarisë ndaj Maqedonisë së Veriut, e pamundësoi hapjen e tyre. Borell tha se gjatë diskutimeve të hënën është kërkuar nga ministrat e Jashtëm përparim “për liberalizimin e vizave për Kosovën”, që është vendi i vetëm në Evropën Juglindore që ndodhet jashtë regjimit të udhëtimit pa viza. “Po ashtu pati edhe pritje të qarta për rifillimin e shpejtë të bisedimeve Beograd – Prishtinë, që siç e dini, do të rifillojnë para fundit të muajit qershor, siç jemi pajtuar me kryeministrin e Kosovës së fundmi”, tha zoti Borrell. Më herët u bë publike edhe letra që Këshilli Europian u dërgonte kërkuar vendeve anëtare të BE që të hapin sa më parë të jetë e mundur negociatat me Shqipërinë dhe Maqedoninë e Veriut.