Gazeta prestigjioze spanjoll “EL PAIS” i ka kushtuar një analizë të gjatë raporteve mes Kosovës, Shqipërisë dhe Maqedonisë së Veriut me Shtetet e Bashkuara të Amerikës dhe Bashkimin Evropian. Duke marrë shkas reagimin e shpejtë dhe ofertën e tri shteteve për të strehuar një numër të madh afganësh, gazeta shkruan se tre vendet janë kthyer me sytë nga SHBA, duke lënë në hije BE-në. “EL PAIS” shkruan se ky rast tregoi orientimin e qartë pro-perëndimor dhe rëndësinë që i jepet miqësisë me Shtetet e Bashkuara të Amerikës, sipas “EL PAIS”, edhe përkundër faktit se Amerika është një fuqi në rënie dhe NATO-ja nuk është duke përjetuar orët më të mira të saj. Një raport i tillë me SHBA-të i Kosovës, Shqipërisë dhe Maqedonisë së Veriut, sipas gazetës bëhet edhe më shumë i kuptueshëm kur merret parasysh fakti se rruga drejt integrimit në bashkimin Evropian është “plot re” dhe e “paralizuar”. Një tjetër faktor është edhe ndryshimi i pushtetit në Shtetet e Bashkuara të Amerikës pas zgjedhjeve të mbajtura në vitin e kaluar. Sipas kësaj gazete, ardhja e Joe Biden në pushtet ka ushqyer shpresat e këtyre tri shteteve se Uashingtoni do të rikthehet në rajon.