Policia e Durrësit ka shoqeruar disa persona në komisariat, pas organizimit të paligjshëm të garave të shpejtësisë. Sipas njoftimit zyrtar, janë 3 shoferë të cilët janë gjobitur me masë administrative nga 400 mijë lekë të vjetra në 1 milionë e 100 mijë lekë. Të shoqeruarit nga Forcat Shqiponja janë me inicialet O. Sh, E. D. dhe I. N., Ata u gjobitën për organizim të garave të parregullta të shpejtësisë, për mungesë në dokumentacionet e automjeteve që drejtonin, për pajisjen e automjeteve me xhama të errët, në kundërshtim me Kodin Rrugor, si dhe për prishjen e qetësisë publike gjatë natës, si pasojë e zhurmave të automjeteve të tyre. Në fund, Blutë e qytetit bregdetar bëjnë me dije se Shërbimet e Policisë Rrugore të Durrësit vijojnë monitorimin e çdo aksi rrugor të qarkut, me pajisje logjistike dhe me patrulla të paloguara në mënyrë që të evidentohen paligjshmëritë në rrugë.