Plani i Google për të futur inteligjencën artificiale në pjesën më të madhe të shërbimeve të saj është pritur me kritika dhe shqetësime në lidhje me privatësinë dhe sigurinë e përdoruesve të teknologjisë. Google synon që të përfshijë inteligjencën artificiale, Gemini te shërbimi i postës elektronike Gmail, që sot numëron mbi 3 miliardë llogari në mbarë botën. Shqetësimet lidhen më shumë me privatësinë se sa me sigurinë. Ekspertët paralajmërojnë se me këtë përditësim, çdo përdorues i shfletuesit Chrome, apo shërbimit Gmail do të ketë një sy e një vesh të përhershëm për çdo veprim që kryen. Google thotë se plani i saj synon që të ofrojë një shërbim sa më të saktë dhe të përvetësuar për klientët, por ekspertët paralajmërojnë se përmasat e mbledhjes së të dhënave personale dhe siguria e tyre është në rrezik. I njëjti kërcënim, sipas tyre vjen edhe nga Microsoft, ndërsa e vetmja kompani që po tregohet e përmbajtur deri më tani në këtë drejtim është Apple.