Kryetarja e Komisionit të Posaçëm Hetimor për Koncesionet në Shëndetësi, Albana Vokshi, ka denoncuar atë që e konsideron si shkelje të ligjit nga maxhoranca, lidhur me hetimorin. Sipas Albana Vokshit, socialistët kanë shpikur votim me firma, duke zhbërë rolin e kryetares së Komisionit, në kundërshti me ligjin, si dhe kanë miratuar planin hetimor me vizita në disa spitale. Në një akt të paprecedentë, anëtarët socialistë të komisionit hetimor, kanë vendosur se opozita nuk i duhet më komisionit dhe rolin e kryetarit që thërret mbledhjet dhe drejton punën e komisionit, e kanë zëvendësuar, duke shpikur votimin me firma.Sipas kësaj procedure antiligjore, që rrëzon shtyllën kryesore të hetimit parlamentar, drejtimin e tij nga kërkuesi, pra nga ne si opozitë, socialistët kanë vendosur dje, në mënyrë të njëanshme dhe të paligjshme, pa na vënë në dijeni, të kryejë vizita në institucionet zbatuese të kontratave objekt hetimi.