Një familje me 5 anëtarë është shpëtuar nga Policia Kufitare në Himarë, pasi mjeti i tyre lundrues pësoi defekt gjatë natës në det, si pasojë e kushteve të këqija atmosferike. Ngjarja u regjistrua mbrëmjen e së martës, rreth orës 22:30, kur policia u njoftua se disa persona në një mjet lundrues, në afërsi të plazhit të Jalës, kishin nevojë për ndihmë. Menjëherë shërbimet e Policisë Kufitare u angazhuan me mjetin e tyre lundrues dhe pas kërkimeve në det arritën të lokalizonin mjetin ku ndodheshin një çift bashkëshortësh dhe tre fëmijët e tyre. Pesë shtetasit u transportuan drejt Pikës së Kalimit Kufitar Himarë në gjendje të mirë shëndetësore. Policia Kufitare ka bërë dhe njëherë tjetër thirrje për respektimin e rregullave të sigurisë në det, përdorimin e pajisjeve mbrojtëse dhe shmangien e lundrimit në kushte të rrezikshme atmosferike.