Një shpërthim i fortë ka ndodhur të mërkurën pasditë në qendër të Parisit, ku disa ndërtesa janë përfshirë nga flakët, ndërsa njëra prej tyre është shembur pjesërisht. Sipas informacioneve të para, shpërthimi është shkaktuar nga një rrjedhje gazi, në rrugën Saint-Jacques në lagjen e 5-të të kryeqytetit francez. Raportohet se 16 persona janë plagosur, ndërsa shtatë prej tyre janë në gjendje kritike. Shpërthimi i fuqishëm shkaktoi shembjen e pjesshme të të paktën një ndërtese, ndërsa të tjerat u përfshinë nga flakët. Forca të forta zjarrfikëse kanë mbërritur në vendngjarje dhe kanë evakuuar zonën. Forcat e ushtrisë kanë shkuar në vendngjarje për të rrethuar zonën. “Disa ndërtesa janë në flakë, prandaj ju lutemi mbani distancën në mënyrë që brigada e zjarrfikësve të ndërhyjë”, tha Edouard Cive, nënkryetar i bashkisë së Parisit. Ishte rreth orës 17:00 kur një shpërthim i fuqishëm tronditi zonën. “Dëgjuam një shpërthim të madh. Ne pamë tym të zi dhe mbeturina kudo Menduam se ra rrufeja! Kishte erë gazi në rrugë”, tha një banor i zonës për gazetën Liberation.