Rusia rifilloi sulmet ndaj Kievit të martën, thanë zyrtarët ukrainas, pasi një armëpushim i shkurtër i njoftuar nga Presidenti i SHBA-së Donald Trump i la vendin sulmeve të reja në kushtet e acarit. Trump tha të enjten se Presidenti rus Vladimir Putin kishte rënë dakord të ndalonte sulmet ndaj Kievit dhe "qyteteve të ndryshme" gjatë motit të ftohtë. Kremlini tha se armëpushimi do të zgjaste deri të dielën, por nuk e lidhi atë me temperaturat nën zero. Ukraina tha se Moska i kishte vazhduar sulmet e saj gjithsesi. Rusia goditi Kievin "në të ftohtin e acartë me një tjetër sulm masiv" gjatë natës, tha të martën në Telegram Tymur Tkachenko, kreu i administratës ushtarake të qytetit. Shërbimet e emergjencës thanë në një postim të mëvonshëm se tre persona në Kiev ishin plagosur. Në qytetin lindor të Harkivit, dy persona u plagosën nga bombardimet ruse, tha shefi ushtarak rajonal Oleg Synehubov. Sulmi që zgjati disa orë kishte në shënjestër infrastrukturën energjetike dhe synonte të "shkaktonte shkatërrim maksimal dhe ta linte qytetin pa ngrohje gjatë ngricave të forta", shkroi Synehubov në Telegram. Autoritetet u detyruan të ulnin ngrohjen në më shumë se 800 shtëpi për të parandaluar ngrirjen e rrjetit më të gjerë, tha ai, duke i nxitur njerëzit të shkonin në "pikat e caktuara" që janë të hapura për 24 orë rreth qytetit nëse kishin nevojë të ngroheshin. Temperaturat gjatë natës ranë në minus 17 gradë Celsius në Kiev dhe deri në minus 23 gradë Celsius në Kharkiv.