Një vullkan në Islandën jugperëndimore ka shpërthyer për herë të gjashtë që nga dhjetori, duke nxjerrë lavë përmes një çarjeje të re në krater, në gadishullin Reykjanes. Imazhet video nga vendngjarja tregonin llavën e zjarrtë që shpërthente nga një carje e gjatë, duke ndricuar qiellin e natës e duke lëshuar tym. “Një shpërthim vullkanik ka filluar. Një çarje është hapur në lindje të Silingarfell-it", tha zyra meteorologjike islandeze në një deklaratë, duke shtuar se shpërthimi kishte nisur në orën 21:26 minuta, sipas orës lokale, pas një serie tërmetesh. Zyrtarët fillimisht thanë se gjatësia e carjes në krater ishte 1.4 km ndërsa më vonë, lëshuan një deklaratë tjetër ku thuhej se carja kishte arritur deri në 3.9 km në vetëm 40 minuta. Zyrtarët thanë se ka ende aktivitet të konsiderueshëm sizmik në skajin verior të carjes, më shumë se një orë pas fillimit të shpërthimit. Aeroporti kombëtar i Islandës tha se fluturimet drejt dhe nga Islanda po funksiononin normalisht pavarësisht shpërthimit. Shpërthimi më i fundit në gadishullin Reykjanes, ku jetojnë 30 mijë banorë ose gati 8% e popullsisë totale të vendit, përfundoi më 22 qershor pasi lëshoi llavë për plot 24 ditë. Shpërthimet tregojnë sfidën me të cilën përballet vendi ishullor me rreth 400,000 banorë, ndërsa shkencëtarët paralajmërojnë se gadishulli Reykjanes mund të përballet me evente të tilla, të përsëritura, për dekada apo edhe shekuj.