Tre persona janë plagosur si pasojë e një shpërthimi pranë një stacioni treni në qytetin gjerman të Mynihut ditën e sotme. Shpërthimi ndodhi gjatë disa punimeve ndërtimi pranë stacionit të metrosë. Ai u shkaktua nga një bombë e vjetër avioni, njoftoi për CNN zëdhënësja e shtypit të policisë së Mynihut, Carolin Schrott. Sipas informacioneve të BILD, bëhej fjalë për një shpërthim bombë të Luftës së Dytë Botërore. Një operacion i gjerë është zhvilluar në zonën e urës Donersberg, ndërsa transporti hekurudhor është ndërprerë në një pjesë të gjerë të qytetit. Tre persona kanë mbetur të lënduar, ndërsa ende nuk është raportuar për ndonjë viktimë. “Për momentin nuk ka prova për ndonjë akt kriminal. Sipas gjetjeve fillestare, kemi tre persona të lënduar, zona e rrezikut është kryesisht e rrethuar dhe qarkullimi i trenave në rrugën kryesore është bllokuar”, tha zëdhënësi i policisë së Mynihut.