Një raketë Starship e SpaceX shpërtheu në hapësirë disa minuta pasi u nis nga Teksasi të enjten, duke detyruar fluturimet e linjave ajrore mbi Gjirin e Meksikës të ndryshojnë kurs për të shmangur rënien e mbeturinave dhe duke penguar po ashtu programin e raketave të Elon Musk. Kontrolli i misionit SpaceX humbi kontaktin me Starship-in pa ekuipazh, tetë minuta pas ngritjes nga Teksasi Jugor në orën 5:38 pasdite. Videoja e xhiruar nga Reuters tregoi lëmsha drite në qiell mbi kryeqytetin e Haitit, Port-au-Prince, që linin pas gjurmë tymi. "Ne humbëm të gjitha komunikimet me anijen - kjo në thelb na tregon se kishim një anomali të konsiderueshme", tha një nga zyrtarët e SpaceX u cili konfirmoi disa minuta më vonë se anija ishte e humbur. Hera e fundit që një anije Starship dështoi ishte në mars të vitit të kaluar, pasi po rihynte në atmosferën e Tokës mbi Oqeanin Indian, por rrallë herë një fatkeqësi e SpaceX ka shkaktuar kaq shumë probleme në trafikun ajror. Dhjetra fluturime komerciale u devijuan në aeroporte të tjera ose ndryshuan kursin për të shmangur goditjen nga mbeturinat e mundshme, sipas faqes së internetit të gjurmimit të fluturimeve FlightRadar24. Nisjet nga aeroportet në Miami dhe Fort Lauderdale, në Florida, u vonuan gjithashtu me rreth 45 minuta. CEO i SpaceX, Elon Musk postoi një video në platformën X që tregon fushën e mbeturinave dhe tha: "Suksesi është i pasigurt, por argëtimi është i garantuar!" Dështimi erdhi një ditë pasi Blue Origin, e miliarderit të Amazon Jeff Bezos, lëshoi me sukses raketën e saj gjigante Neë Glenn në orbitë për herë të parë.