Vullkani Ibu i Indonezisë shpërtheu të hënën në mëngjes, duke lëshuar kolona të trasha hiri gri disa kilometra lart në qiell, tha agjencia e vullkanologjisë e vendit. Vullkani në ishullin e largët të Halmahera shpërtheu në orën 9:12 të mëngjesit për rreth pesë minuta, duke lëshuar hirin në qiell deri në lartësinë 5 km, thanë zyrtarët. Një shpërthim më i vogël u regjistrua gjithashtu të premten. Gjendja e alarmit për vullkanin mbetet në nivelin e dytë më të lartë, tha në një deklaratë Qendra e Rrezikut të Vullkanologjisë dhe Gjeologjisë në Indonezi. Të gjitha aktivitetet brenda një rrezeje prej pesë kilometrash të vullkanit janë të ndaluara. "Nëse hiri nis të bjerë në tokë, ne rekomandojmë njerëzit që janë afër vullkanit të mbajnë maskë dhe syze," thanë zyrtarët. Pamjet e shpërthimit të shpërndara nga qendra treguan retë e hirit gri që dilnin nga krateri. Zyrtarët thanë se u dëgjua gjithashtu një zhurmë e madhe. Deri më tani nuk është raportuar për evakuim të banorëve. Indonezia ndodhet mbi të ashtuquajturën "Unazën e Zjarrit" të Paqësorit dhe ka 127 vullkane aktive. Javët e fundit vullkani Ruang i Sulaëezit të Veriut ka shpërthyer, duke nxjerrë llavë inkandeshente ndërsa shpërthimet nuk janë ndalur nga krateri i tij. Kjo bëri që autoritetet të evakuojnë më shumë se 12,000 njerëz që jetonin në një ishull aty pranë. Në dhjetor, më shumë se 20 persona humbën jetën pasi vullkani Marapi, një nga vullkanet më aktivë të Sumatrës, shpërtheu dhe ngriti retë e hirit deri në 3 kilometra lartësi.