Një vullkan në ishullin lindor të Indonezisë, Halmahera, shpërtheu të mërkurën në mëngjes duke nxjerrë një re hiri katër kilometra të lartë dhe duke detyruar autoritetet të rrisin nivelin e alarmit në zonat përreth, duke e cuar atë në nivelin më të lartë, thanë zyrtarët. Mali Ibu shpërtheu në orën 07:11 të mëngjesit sipas orës lokale, tha në një deklaratë agjencia e vullkanologjisë në vend. Retë e hirit gri u ngritën në qiell. Banorët dhe turistët janë ndaluar të afrohen në një rreze prej të paktën 5 kilometrash nga krateri. Mali Ibu shpërtheu gjithashtu edhe të martën pasdite, duke nxjerrë një re hiri vullkanik tre km të lartë. Janë rreth 13,000 banorë që jetojnë pranë vullkanit, tha një zëdhënës i agjencisë së fatkeqësive natyrore në Indonezi. Megjithatë, deri më tani nuk ka një plan për evakuimin e banorëve. Aktivitetet e malit Ibu, pasojnë një seri shpërthimesh të vullkaneve të ndryshme në Indonezi, vend ky që ndodhet në të ashtuquajturën "Unazën e Zjarrit" të Paqësorit dhe ka 127 vullkane aktive. Ibu pati një seri shpërthimesh vitin e kaluar. Në maj 2024, vullkani detyroi evakuimin e njerëzve që jetonin në të paktën shtatë fshatra rreth tij.