Një shpërthim i fuqishëm është regjistruar në një pikë karburanti në zonën e Brryllit në Tiranë. Ngjarja ka ndodhur rreth orës 07:00 të mëngjesit të së mërkurës. Si pasojë e shpërthimit, një strukturë njëkatëshe është dëmtuar rëndë dhe pjesërisht është shembur. Brenda saj ndodheshin tre punonjës të karburantit, që mbetën të plagosur. Ata janë transportuar në Spitalin e Traumës për të marrë ndihmën e nevojshme mjekësore. Paraprakisht mësohet se që të tre janë jashtë rrezikut për jetën. Forca zjarrfikëse dhe ato të policisë mbërritën në vendin e ngjarjes për të shmangur një tragjedi edhe më të madhe, teksa shpërthimi ka shkaktuar panik te banorët e zonës dhe bllokim të qarkullimit të automjeteve në rrugët pranë pikës së karburantit. Hetimet janë përqëndruar në zbulimin e shkaqeve të shpërthimit. Paraprakisht dyshohet se shkak është bërë një bombol gazi, teksa rasti rikthen edhe njëherë debatin mbi sigurinë e pikave të tregtimit të karburantit në zonat urbane dhe distancat e tyre me zonat e banuara.