Moti i keq ka mbërthyer gjermaninë këto ditë duke ndëshkuar pjesën jugore të vendit me përmbytje dhe viktima po ahstu. Zonat jugore të vendit u përballën me një fundjavë me reshje të forta shiu ndërkohë që situata mbetet kritike në zonat përgjatë Danubit. Gjendja është më e rëndë në landet Baden Vyrtenberg dhe në Bavari. Regensburgu shpalli gjendjen e katastrofës, bashkë me disa zona të tjera. Të hënën në mëngjes u shemb edhe një argjinaturë në Pfafenhofen dhe banorëve iu kërkua të ngjiten në katet më të larta të shtëpive. Kurse në Bavari u evakuuan të dielën rreth 3000 vetë. Në disa zona gjatë fundjavës brenda një dite ra aq shumë shi sa mesatarisht bie për një muaj. Në Kisleg, në landin e Baden-Vyrtembergut ranë brenda një dite 130 litra shi për metër katror, sipas Shërbimit Metereologjik Gjerman. Po ashtu edhe në zona të tjera shirat ishin shumë të dendur. Megjithëse reshjet në jug të Gjermanisë janë pakësuar, gjendja mbetet e tensionuar. Niveli i ujërave të lumenjve rritet dhe priten përmbytje në rajone të tjera. Rini dhe lumi Nekar kanë shënuar nivele rekord. Pranë Karlsruhes, Rini kaloi pragun e 7,5 metrave. Paraditen e së hënës, kancelari Olaf Scholz, i shoqëruar nga ministrja e Brendshme, Nancy Faeser vizituan zonat e përmbytjes në Bavari. Pas humbjes së jetës të një zjarrfikësi 42 vjeçar gjatë një aksioni shpëtimi, kancelari gjerman, Olaf Scholz falënderoi trupat e emergjencës dhe shprehu respektin për punën që po bëjnë në zonat e përmbytjes. Edhe ushtria gjermane ka shkuar në disa zona për ndihmë.