Sipas të dhënave të shërbimeve sekrete britanike numri i dezertorëve rusë është rritur ndjeshëm këtë vit. Nga janari deri në maj gjykatat ushtarake ruse kanë trajtuar 1.053 raste të dezertimit nga shërbimi ushtarak, bëri të ditur Ministria e Mbrojtjes në Londër duke u bazuar në të dhënat e gazetarëve investigativë rusë. Kjo shifër është më e lartë se i gjithë viti 2022. Në dosjet e gjykimit thuhet se shumica e dezertorëve janë dënuar me kusht, për t'u dërguar sërish në luftë. "Ushtria ruse që nga fillimi i luftimeve në Ukrainë ka vështirësi të zbatojë disiplinën dhë radhët e saj, por këto vështirësi, që nga mobilizimi me detyrim i rezervistëve në dhjetor 2022 ka shumë gjasa të jenë përkeqësuar", thuhet në vlerësimin e shërbimeve sekrete britanike. Sipas tyre përpjekjet ruse për përmirësimin e disiplinës përqëndrohen në dënimet e dezertimeve dhe nxitjen e patosit patriotik, në vend që të merren me arsyet e vërteta të dezertimit të ushtarëve. Të shumtë janë rusët që kanë mbërritur në gjermani, në përpjekjen e tyre për t’i ikur luftës, e kanë kërkuar madje atje edhe azil. Por, autoritetet gjermane, janë të kursyer me përgjigjet pozitive. Nga rreth 2500 kërkesa për azil, vetëm 55 janë pranuar, bën të ditur ministria e brendshme gjermane.