Policia e Tiranës ka finalizuar operacionin e koduar ‘Parkimi’ duke arrestuar dy të rinj për shpërndarje të lëndëve narkotike si dhe duke shpallur në kërkim një tjetër. Sipas njoftimit të policisë në bazën e informacioneve të marra në rrugë operative Seksioni për Hetimin e Narkotikëve në Drejtorinë Vendore të Policisë Tiranë finalizoi operacionin e koduar “Parkimi”, në kuadër të të cilit u bë kapja dhe arrestimi në flagrancë një 18 vjeçari dhe një 20 vjeçari, të dy banues në Tiranë. Gjatë operacionit në rrugën "Rrapo Hekali" , shërbimet e Policisë ushtruan kontroll në parkingun ku ishte punonjës 18 vjeçari, dhe si rezultat i kontrollit Policia gjeti dhe sekuestroi lëndë narkotike kanabis të ndarë në doza gati për shitje, si dhe në një ambient tjetër të parkingut gjeti dhe sekuestroi edhe një sasi tjetër lendë narkotike, gjithësej rreth 620 gramë, 3 aparate celular, 2 peshore elektronike, 1 aparat DVR dhe 1 shkop bejsbolli.