Franca është e hapur për të diskutuar vendosjen e armëve bërthamore të saj, në vende të tjera në Evropë, tha Presidenti Francez Emmanuel Macron. Gjatë një interviste me transmetuesin francez TF1 të martën, Macron tha se SHBA-të tashmë kanë avionë të armatosur me armë bërthamore në Evropë. "Amerikanët kanë bombat në aeroplanë në Belgjikë, Gjermani, Itali, Turqi", tha Macron. "Ne jemi gati ta hapim këtë diskutim". "Do ta përcaktoj kornizën në një mënyrë shumë specifike në javët dhe muajt që vijnë," tha ai. Macron tha se çdo zgjerim i mbrojtjes bërthamore të Francës në vendet e tjera evropiane do t'i nënshtrohej kushteve, duke përfshirë sigurimin që përdorimi i tyre të mbetet vetëm në duart e presidentit francez. "Gjithmonë ka pasur një dimension evropian që merr parasysh interesat jetësore", tha Macron. Franca, fuqia e vetme bërthamore e Bashkimit Evropian, nuk do të paguante për sigurinë e të tjerëve dhe aftësitë e saj mbrojtëse duhet të mbeten plotësisht të paprekura, theksoi ai. Franca mbante rreth 280 koka bërthamore në vitin 2024, sipas shifrave nga Instituti Ndërkombëtar i Kërkimeve për Paqen në Stokholm. Ushtria e saj ka fuqinë t'i lëshojë këto në mënyrë të pavarur nga nëndetëset e veta ose të përdorë avionë për t'i lëshuar ato nga qielli.