Prokuroria e Posaçme ka mbyllur hetimet për ish kryebashkiakun e Kavajës Elvis Rroshi, dhe ka dërguar dosjen në gjykatë. Pak ditë pas paraqitjes së Rroshit në SPAK, i cili firmosi mbylljen e hetimeve, prokurori Elvin Gokaj ka bërë kërkesë në GJKKO për të kaluar çështjen ndaj Rroshit për gjykim. Rudina Palloj është caktuar gjyqtare për të shqyrtuar kërkesën e prokurorisë, lidhur me ish kryetarin e Bashkisë Kavajë që është marrë i pandehur për veprën penale “shpërdorim detyre”. Hetimi ndaj ish-kryebashkiakut erdhi pas një kallëzimi të bërë nga Kontrolli i Lartë i Shtetit për parregullsi në tendera gjatë periudhës së tij në krye të Bashkisë së Kavajës. Sipas hetimeve, dyshohet se Rroshi dhe disa zyrtarë të tjerë shkaktuan një dëm ekonomik prej 33 milionë lekësh me tenderët e rikonstruksionit të qendrës së qytetit dhe ndërtimin e disa rrugëve.