Policia italiane ka kapur një sasi prej 17 kilogramësh kokainë të pastër për një vlerë prej 2 milion euro. Në pranga ka rënë një 44-vjeçar shqiptar dhe një 34 vjeçare rumune që po udhëtonin me një makinë me një targë gjermane. Mediat italiane shkruajnë se arrestimet u zhvilluan gjatë një kontrolli të territorit në vendet me fluksin më të madh turistik. Makina, një Volvo, në fakt u ndalua në daljen e autostradës Senigallia pasi më herët ishte sinjalizuar se ajo po ecte me shpejtësi të lartë. Policia menjëherë pati dyshime ndërkohë që kreu edhe një kontroll me qenin e antidrogës, i cili menjëherë identifikoi vendin e fshehtë ku ishte futur kokaina, në fundin e bagazhit që ishte i pajisur me një sistem të sofistikuar elektronik dhe mekanik. Pasi u gjetën 15 pakot, ato u ekzaminuan dhe u pa se bëhej fjalë për kokainë të një cilësie të lartë. Sipas autoriteteve italiane, vlera e kokainës shkon deri në 2 milionë euro.