Një shtetas shqiptar është dënuar nga një gjykatë në Britaninë e Madhe me ndalim drejtimi për dy vite, pasi u kap duke drejtuar automjetin nën efektin e kokainës dhe kanabisit. Sipas mediave britanike, 32-vjeçari u ndalua nga policia më 2 prill, rreth orës 01:00 të mëngjesit, teksa po drejtonte një Audi pa dokumentet e nevojshme të kontrollit teknik. Policia e ndaloi pasi automjeti u pa duke lëvizur me shpejtësi të lartë pranë një rrethrrotullimi. Testet zbuluan praninë e substancave narkotike, ndërsa analizat laboratorike konfirmuan praninë e kokainës në gjak. Në seancën gjyqësore, ai pranoi fajësinë për drejtim nën efektin e drogës dhe për përdorimin e mjetit pa kontroll teknik. Avokatja e tij deklaroi se klienti e kishte blerë makinën po atë ditë dhe nuk ishte në dijeni për mungesën e dokumentacionit. Krahas ndalimit nga drejtimi për 2 vite, gjykata e dënoi shqiptarin me 12 muaj shërbim komunitar, 180 orë punë pa pagesë, si dhe e detyroi të paguajë 85 paund për kostot gjyqësore dhe një 114 paund gjobë administrative.