Donald Trump dikur mburrej “Kur je yll, të lejojnë ta bësh. Ju mund të bëni gjithçka që doni”. Deklarata me të cilën ai ka jetuar për dekada më në fund u rrëzua të enjten kur një juri në Nju Jork i tha: jo. Një nga burrat më të fuqishëm dhe më të rëndësishëm në botë më u sfidua nga një yll i filmave për të rritur dhe u shpall fajtor se kishte gënjyer për paratë që i kishte dhënë asaj për të mbyllur gojën. Duajeni atë ose urrejeni, por ka një gjë për të cilën shumica e amerikanëve bien dakord: në dy shekuj e gjysmë që nga themelimi i republikës së tyre, nuk ka pasur kurrë një president si Trump. Dhe verdikti i së enjtes shton një kapitull të ri, të paprecedentë në historinë e tij, duke e bërë atë ish-presidentin e parë të vendit që është dënuar ndonjëherë për një krim. Këtë nëntor ai mund të bëhet presidenti i parë kriminel në historinë e SHBA. I papërshkueshëm nga turpi apo edhe sikleti, Trump e ka kthyer çdo ngatërresë me ligjin në një simbol nderi: provë, thotë ai, e teorisë së tij të konspiracionit se një ‘deep state’ është gati për ta mbërthyer atë.