Ministri rus i mbrojtjes, Sergei Shoigu, inspektoi trupat e vendit të përfshira në atë që moska vazhdon ta quajë operacion të posacëm ushtarak në Ukrainë – tha ministria e mbrojtjes të dielën. “Shefi i ushtrisë ruse fluturoi mbi zonat ku janë dislokuar trupat dhe kontrolloi pozicionet e avancuara të njësive ruse në zonën e operacionit të posacëm ushtarak”, tha ministria në aplikacionin e mesazheve Telegram. Moska e quan pushtimin e saj të Ukrainës, një operacion të posacëm ushtarak për të demilitarizuar dhe denazifikuar fqinjin e saj. Kievi dhe aleatët e konsiderojnë një akt të paprovokuar pushtimi. Ministria tha në deklaratë se Shoigu foli me trupat në vijën e frontit dhe në një pikë komande, por nuk është bërë e qartë se kur ishte zhvilluar vizita dhe as nëse Shoigu kishte hyrë personalisht në Ukrainë. Një video e shkurtër e publikuar bashkë me deklaratën, tregonte Shoigu në një helikopter ushtarak dhe disa goditje në një zonë fushore. Njoftimi erdhi ndërkohë vetëm një ditë pasi presidenti rus vladimir Putin zhvilloi një takim me komandantët më të lartë ushtarakë në vend, përfshirë edhe vetë ministrin Shoigu, duke kërkuar prej tyre propozime se si duhej të vazhdonte fushata ushtarake e rusisë në Ukrainë. Një seri disfatash në 10 muaj luftë, kanë rezultuar me tërheqjen e rusisë nga zonat rreth kievit dhe qytetit të dytë më të madh të Ukrainës, Kharkiv, e më së fundmi edhe nga qyteti i Khersonit. E gjithë kjo ka detyruar Putinin të thërrasë nën armë rezervistët dhe ka gjeneruar kritika të rralla publike nga blogerët ushtarakë dhe disa aleatë po ashtu. Që nga emërimi në tetor i gjeneralit të forcës ajrore Sergei Surovikin, si udhëheqës të luftës, forcat tokësore ruse janë fokusuar më shumë në mbrojtje se sa në sulm, me valë sulmesh ajrore mbi qytete që kanë lënë me mijëra civilë ukrainës pa ngrohje, pa energji dhe pa ujë për ditë të tëra, ndërkohë që dimri ëhstë ulur këmbëkryq në vend.