Një zjarr i përmasave të mëdha ka përfshirë mesditën e se martës një fermë blegtorale në Patos, duke shkaktuar dëme të mëdha materiale dhe humbje në bagëti. Flakët u përhapën me shpejtësi, të favorizuara nga temperaturat e larta dhe prania e sasive të mëdha të ushqimit për bagëtitë. Fermerët dhe banorët e zonës u përpoqën të shpëtonin kafshët, ndërsa në vendngjarje ndërhynë menjëherë forcat zjarrfikëse të Patosit. Për shkak të përmasave të zjarrit dhe rrezikut për objektet përreth, në operacion u angazhuan edhe zjarrfikësit e Fierit. Pas disa orësh pune intensive, flakët u vunë nën kontroll, duke parandaluar përhapjen e tyre më tej. Bilanci paraprak është i rëndë. Mbi 10 krerë bagëti u dogjën, ndërsa u shkrumbuan sasi të mëdha ushqimi për bagëtitë, makineri bujqësore dhe stalla e fermës. Dëmet materiale vlerësohen paraprakisht në rreth 7 milionë lekë. Në vendngjarje ndodhen shërbimet e Policisë dhe grupi hetimor, të cilët kanë nisur hetimet për të zbardhur shkaqet e zjarrit.