Shkrimtari hungarez Laszlo Krasznahorkai fitoi Çmimin Nobel në Letërsi për vitin 2025, tha organi që jep çmimin të enjten, "për veprën e tij bindëse dhe vizionare që, në mes të terrorit apokaliptik, riafirmon fuqinë e artit". "Laszlo Krasznahorkai është një shkrimtar i madh epik në traditën e Evropës Qendrore që shtrihet nga Kafka te Thomas Bernhard, dhe karakterizohet nga absurdizmi dhe tepria groteske", tha Akademia në një deklaratë. Ai është hungarezi i dytë që fiton çmimin e dhënë nga Akademia Suedeze, pas Imre Kertesz në vitin 2002. Krasznahorkai lindi në qytetin e vogël Gyula në Hungarinë juglindore, pranë kufirit rumun. Romani i tij i vitit 1985, Satantango, zhvillohet në një zonë rurale po aq të largët dhe u bë një sensacion letrar në Hungari. Krasznahorkai ka patur një partneritet të ngushtë krijues me regjisorin hungarez Bela Tarr. Disa nga veprat e tij janë adaptuar në filma. Të përcaktuar në testamentin e shpikësit të dinamitit dhe biznesmenit suedez Alfred Nobel, çmimet për arritjet në letërsi, shkencë dhe paqe janë dhënë që nga viti 1901. Fituesit e mëparshëm të çmimit të letërsisë prej 11 milionë kronash suedeze përfshijnë romancierin dhe shkrimtarin amerikan Ëilliam Faulkner, kryeministrin britanik të Luftës së Dytë Botërore Ëinston Churchill, Orhan Pamuk të Turqisë dhe Jon Fosse të Norvegjisë. Gjatë viteve, zgjedhjet e bëra nga Akademia Suedeze kanë tërhequr po aq shumë zemërim sa edhe duartrokitje. Në vitin 2016, çmimi për kantautorin amerikan Bob Dylan shkaktoi kritika se vepra e tij nuk ishte letërsi e mirëfilltë, ndërsa çmimi i austriakut Peter Handke gjithashtu u kritikua në vitin 2019. Handke kishte marrë pjesë në funeralin e ish-presidentit jugosllav Slobodan Millosheviq, në vitin 2006, i cili nga shumë njerëz shihej si përgjegjës për vdekjen e mijëra shqiptarëve etnikë në Kosovë dhe zhvendosjen e pothuajse 1 milion të tjerëve gjatë një luftës së viteve 98-99. Fituesit e çmimeve janë akuzuar edhe në të kaluarën se janë snobistë, se kanë paragjykime antiamerikane dhe se kanë injoruar disa nga gjigantët e letërsisë, përfshirë Lev Tolstoy të Rusisë, Emile Zola të Francës dhe James Joyce të Irlandës.