Kur duhen edhe 5 ditë nga nisja e vitit të ri shkollor, kryeministri Rama ka dhënë sërish mesazhe për mënyrën sesi duhet të sillemi me pandeminë e koronavirusit. Gjatë një takimi me nxënësit dhe mësuesit e shkollës “Leonik Tomeo”, për mënyrat se si do të zhvillohet mësimi këtë sezon, shefi i qeverisë tregoi rastin e vdekjes së vëllait të një mikut të tij. “Jo më larg se dje unë dëgjova për një person që e kam njohur personalisht, vëllai i një shokut tim që humbi jetën e nuk ishte në një moshë shumë të madhe, ishte i ri. Askush nuk e përcakton dot deri në fund se si dhe pse virusi bën gjëmën tek dikush dhe shfaqet në mënyrë komplet të padukshme te dikush tjetër. Problemi është që shumë nga ne mund ta marrin e se marrin vesh që e kanë, s’ndiejmë asgjë, vazhdojmë jetën normalisht, e prandaj duhet të sillemi sikur e kemi virusin se ia kalojmë familjarëve, miqve e shokëve“.