Muaji i kaluar ishte janari më i ngrohtë në botë, i regjistruar ndonjëherë, dhe ky fakt ka ngritur pikëpyetje të mëtejshme në lidhje me ritmin e ndryshimeve klimatike, thonë shkencëtarët. Janari 2025 pritej të ishte pak më i freskët se janari 2024 për shkak të një zhvendosjeje nga një model moti natyror në Paqësor i njohur si El Niño. Por në vend të kësaj, muaji i kaluar theu rekordin e janarit 2024 me gati 0.1gradë celcius, sipas shërbimit evropian të klimës Copernicus. Ngrohja e botës është për shkak të emetimeve të gazeve që ngrohin planetin nga aktivitetet njerëzore, kryesisht djegia e lëndëve fosile, por shkencëtarët thonë se nuk mund të shpjegojnë plotësisht pse muaji i kaluar ishte veçanërisht i nxehtë. Ai vazhdon një seri rekordesh çuditërisht të mëdha të temperaturave që nga mesi i vitit 2023, me temperatura rreth 0.2gradë celcius mbi atë që pritej. “Arsyeja themelore që ne kemi thyer rekorde dhe kemi pasur këtë prirje të ngrohjes prej dekadash, është sepse po rrisim sasinë e gazeve që shkaktojnë efektin serrë në atmosferë”, tha për BBC Gavin Schmidt, drejtor i Institutit Goddard për Studimet Hapësinore të NASA-s. "Specifikat se pse viti 2023, dhe 2024, dhe fillimi i 2025-ës, ishin kaq të ngrohta nuk i dimë ende, ka elementë të tjerë të përfshirë këtu. Ne po përpiqemi t'i zbulojmë ato."