Planeti mund të ketë vetëm një vit kohë, ose më pak, para se vaksinat e gjeneratës së parë anti-covid të bëhen inefikase dhe modifikime të tyre të jenë të nevojshme. Një studim i epidemiologëve, virologëve dhe specialistëve të sëmundjeve infektive, ka dalë në këtë përfundim. Shkencëtarët prej kohësh në fakt kanë nënvizuar se një përpjekje globale vaksinimi është e nevojshme për të neutralizuar në mënyrë të kënaqshme kërcënimin nga koronavirusi. Kjo për shkak të kërcënimit nga variantet e virusit, disa më të transmetueshme, më vdekjeprurëse dhe më pak të ndjeshme ndaj vaksinave, që po shfaqen. Parashikimi i zymtë për një vit kohë, ose më pak, vjen nga dy të tretat e të anketuarve, sipas aleancës vaksinat e popullit, një koalicion organizatash që përfshin Amnesty International, Oxfam dhe UNAIDS, që janë mbështetur në studimin e tyre në vëzhgimin e 77 shkencëtarëve nga 28 vende. Rreth një e treta e tyre kanë pohuar se dritarja e kohës është 9 muaj ose më pak. Mbulimi i ulët me vaksina në shumë vende do ta bënte më të mundshëm shfaqjen e mutacioneve rezistente ndaj vaksinave, thotë 88 për qind e të anketuarve që punojnë në institucione prestigjioze si Johns Hopkins, Yale, Imperial College etj.