23-vjeçari Amadeo Fufi, I cili u arrestua nga policia në Mamurras pasi shoqëronte personin në kërkim Leonard Demën dhe tentoi të përplaste efektivët blu duke iu rrezikuar jetën, do të qëndrojë në burg. Gjykata e Lezhës e cilësoi të ligjshëm arrestimin e Amadeo Fufit dhe caktoi ndaj tij masën e sigurisë “Arrest në burg” për veprat penale “Mbajtja pa leje dhe prodhimi i armëve, armëve shpërthyese dhe municionit” si dhe “Kundërshtim i punonjësit të Policisë së Shtetit”. Në momentin e aksionit të policisë, Amadeo Fufi ishte I armatosur dhe iu ka drejtuar armën e zjarrit efektivëve. Sakaq, 23-vjeçari Leonard Dema u njoh me masën e sigurisë në Spitalin e Traumës në Tiranë, ku po merr mjekim pas plagosjes gjatë aksionit të policisë, ku shkëmbyen zjarr ndaj uniformave blu. Gjykata vendosi që ai të qëndrojë në burg me qëllim ekstradimin drejt Italisë. Ai është dënuar me 7 vite burg nga Gjykata e Trentos për kryerjen e veprës penale “Tentativë vrasjeje”, të parashikuar nga legjislacioni penal italian.