Protesta e shoqëruar me akte të dhunshme në Shkodër është nën hetim nga autoritetet, ndërsa mësohet se 8 persona janë proceduar penalisht, mes tyre edhe kryebashkiakja Voltana Ademi. Por, në mesin e procedimeve janë edhe 17 minorenë, që procedohen për shkatërrim prone, krahas 21 të tjerëve për pjesëmarrje në tubime të paligjshme. Por, procedimit penal nuk i kanë shpëtuar as dy punonjës të zjarrfikëses së Bashkisë së Shkodrës nën akuzën e shpërdorimit të detyrës. Protesta e paradites së të shtunës nisi me një grup të miturish, që në përfundim të asaj që u cilësua si një tubim paqësor kanë thyer disa banderola në sheshin “Nënë Tereza” dhe kanë tentuar të kryejnë veprime të dhunshme, por janë penguar nga punonjësit e Policisë. Nga sendet e forta dhe lëndët piroteknike të përdorura nga këta persona është dëmtuar një punonjës policie. Më pas, pjesmarrësit në tubim janë shpërndarë në disa grupe dhe drejtime të ndryshme. Një grup personash është drejtuar te selia e një Partisë Socialiste, ku disa persona të mitur kanë ushtuar veprime të dhunshme duke thyer e shkatërruar xhamat e dyert dhe më pas kanë nxjerrë dhe djegur orenditë që ndodheshin brenda godinës. Specialistët për Hetimin e Krimeve, në bazë të pamjeve filmike, kanë proceduar penalisht 17 minorenë, për veprat penale “Shkatërrimi i pronës me zjarr”, “Organizimi dhe pjesëmarrja në grumbullime e manifestime të paligjshme” dhe “Prishja e qetësisë publike”. Policia e Shkodër apelon për të gjithë prindërit që të mos lejojnë fëmijët të marrin pjesë në tubime dhe të përfshihen në veprime të dhunshme pasi në radhë të parë rrezikojnë jetën e tyre. Gjithashtu apelon për të gjithë qytetarët dhe organizatorët që të mos organizojnë dhe marrin pjesë në tubime të paligjshme, aq më tepër në këtë kohë pandemie sepse është rrezik i madh për shëndetin e qytetarëve