Rekrutimet e të rinjve shqiptarë nga grupe kriminale të kultivimit të lëndëve narkotike, kryesisht cannabis sattiva në Britaninë e madhe, kanë qenë kryefjalë e medieve ndërkombëtare, sidomos atyre britanike. Nëpërmjet rrjeteve sociale e jo vetëm, grupet kriminale rekrutonin të rinj, për të punuar për ta në shtëpi bari. Por përballë këtij realitetit, duket se ka edhe një tjetër edhe më të rëndë, në Italinë Fqinje, rekrutimin e të rinjve shqiptarë për trafikim të kokainës dhe lëndëve të tjera psikotrope. Policia italiane ka goditur dy grupe kriminale të trafikut të drogës në zonën e Milanos. Aksionet e koduara “Thirrja” dhe “Rivendosja” morën udhë në muajin Shtator 2023 dhe në pranverën e këtij viti, teksa hetuesit mbajtën në shënjestër një grup të ri kriminal shqiptarësh, me baza në territoret e Neive, Castagnito dhe Magliano Alfieri. Sipas autoriteteve italiane bëhej fjalë për rekrutim të të rinjve shqiptarë, mes tyre edhe të mitur, për trafikim kokaine dhe lëndësh të tjera psikotrope. Gjithashtu u gjet edhe skema, teksa të dyshuarit pa precedentë penalë silleshin me viza turistike dhe banonin në territoret Magliano Alfieri dhe Mango. Pasi mbaronte periudha e tyre e "punës", ata ktheheshin në Shqipëri dhe zëvendësoheshin nga të rinj të tjerë. Organizata drejtohej nga një çift bashkëshortësh shqiptarë, rezidentë të rregullt në Itali, me banim në Castagnito. Në krye qëndronte burri 41-vjeçar. Mbikëqyrja dhe investigimi zbuluan se si i dyshuari rekrutonte të rinjtë bashkëkombas, se si u gjente makinat e shumta për punë dhe deri në zbulimin e bazës ku fshihej lënda narkotike. Në një nga ndërhyrjet u sekuestruan 344 gramë kokainë e futur në kavanoza. Karabinierët nuk ndërhynë menjëherë, por vijuan vëzhgimin, derisa gjetën edhe strehën e dytë, me rreth 683 gram kokainë të tjera dhe në total 1 kg drogë. Pas kësaj, u bë e mundur arrestimi I 41 vjeçarit shqiptar, dy 22-vjeçarëve, teksa në hetim është bashkëshortja e shqiptarit 30 vjeçe e kushëriri I saj 24 vjeç. Ndërkohë në pranga kanë rënë edhe një 19 vjeçar e një tjetër 25 vjeç, të akuzuar për trafik droge.