Policia evropiane tha të mërkurën se kishte shkatërruar një rrjet të madh droge sintetike që vepronte në disa vende në "operacionin më të madh ndonjëherë" të këtij lloji, duke i dhënë një "goditje masive" krimit të organizuar. Autoritetet çmontuan 24 laboratorë dhe sekuestruan rreth 1,000 ton kimikate të përdorura për të bërë droga sintetike si MDMA, amfetaminë dhe metamfetaminë. "Kam kohë që merrem me këtë punë. Ky është deri tani operacioni më i madh që kemi bërë ndonjëherë kundër prodhimit dhe shpërndarjes së drogës sintetike", tha Andy Kraag, kreu i Qendrës Evropiane të Krimit të Organizuar të Europolit. "Mendoj se kjo është vërtet një goditje masive për grupet e krimit të organizuar të përfshira në trafikun e drogës, konkretisht të drogës sintetike", shtoi Kraag. Fitimet e gjeneruara ishin "të konsiderueshme", tha policia polake në një konferencë shtypi në Varshavë. Për çdo euro të shpenzuar për prodhimin e drogës, trafikantët siguronin afërsisht 30 euro fitim. Operacioni njëvjeçar përfshiu policitë e Belgjikës, Republikës Çeke, Gjermanisë, Holandës, Polonisë dhe Spanjës.