Shërbimet policore të Shkodrës kanë bërë të mundur finalizimin me sukses të operacionit policor të kodur ‘Buna 2021’, për goditjen e veprimtarisë kriminale në fushën e narkotikëve dhe armëmbajtjes pa leje. Uniformat blu vunë në pranga 8 persona, ndërsa një tjetër është shpallur në kërkim. Sipas burimeve policore të arrestuarit janë Arjan Cerjani, Enkeledia Cerjani, Leart Cerjani, Luis Cerjani, Emiljan Hajdaraj, Gjergj Pllumbi, Indrit Ishmakej, Valentin Plenishta të gjithë banues në Shkodër. Ndërsa është shpallur në kërkim Redi Idrizi, 35 vjec, po banues ne Shkodër. Nga tërësia e veprimeve hetimore të kryera ka rezultuar se aktiviteti i këtij grupi kriminal është shtrirë gjatë një kohe të konsiderueshme në qytetin e Shkodrës, ku janë dokumentuar shumë raste të shkëmbimit të medikamenteve midis Redi Idrizit dhe Arjan Cerjanit. Më pas, këto medikamente, të arrestuarit e tjerë ua shisnin personave të ndryshëm që ishin në terapi nga përdorimi i lëndëve narkotike. Gjatë këtij operacioni u sekuestruan 5 armë zjarri, 6 thika, një sasi metadoni, një automjet e sende të tjera. Materialet i kaluan Prokurorisë së Rrethit Gjyqësor Shkodër, për veprime të mëtejshme.