I dërguari i presidentit amerikan, Donald Trump, për Ukrainën dha se rreziku i përshkallëzimit nga lufta në Ukrainë po “rritet ndjeshëm”, pasi forcat ukrainase përdorën dronë për të sulmuar bombarduesit bërthamorë rusë në disa baza ajrore thellë brenda Rusisë. Ukraina tha se ka sulmuar bazat ajrore në Siberi dhe në pjesë të tjera në veri të Rusisë gjatë fundjavës, duke shënjestruar objektiva deri në 4.300 kilometra larg nga vijat e frontit. “Nivelet e rrezikut po rriten ndjeshëm pas asaj që ndodhi gjatë fundjavës”, tha i dërguari i Trumpit, Keith Kellogg, për Fox Neës. “Njerëzit duhet ta kuptojnë këtë në kontekstin e sigurisë kombëtare: kur sulmon një pjesë të sistemit të mbijetesës kombëtare të kundërshtarit, që është struktura bërthamore, atëherë nënkupton që rritet niveli i rrezikut sepse nuk e di se çfarë do të bëjë pala tjetër”, shtoi ai. Kellogg tha se dëmi ndaj bombarduesve rusë gjatë fundjavës është më pak i rëndësishëm sesa ndikimi psikologjik mbi Rusinë, duke shtuar se ai është i shqetësuar nga raportimet për sulmet. Zëdhënësja e Shtëpisë së Bardhë, Karoline Leavitt, tha të martën se presidenti Trump nuk ishte njoftuar paraprakisht për sulmet me dronë të Ukrainës ndaj bombarduesve në Rusi. Të hënën, Rusia dhe Ukraina zhvilluan bisedime, por nuk u bë ndonjë përparim drejt përfundimit të luftës, që Moska nisi mbi tre vjet më parë ndaj shtetit fqinj. Sa i përket bisedimeve, Kellog tha se Ukraina kishte një qëndrim “shumë të arsyeshëm”, por Rusia kishte shkuar në bisedime “me një qëndrim shumë maksimalist”.