Banorët në republikën demokratike të Kongos janë rikthyer në shtëpitë e shkatërruara pasi një vullkan i madh shpërtheu, me shumë prej tyre që kërkojnë për të dashurit e zhdukur. Mali Niragongo e bëri qiellin të kuq dhe nxorri një lumë llave të shtunën, por kurseu Goman, një qytet me dy milionë banorë në jug të vullkanit. Të paktën 15 viktima janë konfirmuar por numri me gjasë do të rritet pasi zyrtarët vazhdojnë kërkimet në zonat e goditura më rëndë. Nëntë nga viktimat humbën jetën në një aksident trafiku ndërsa njerëzit largoheshin. Katër të tjerë u vranë ndërsa përpiqeshin të arratiseshin nga një burg ndërsa dy u dogjën për vdekje. Më shumë se 170 fëmijë fruhet se janë të zhdukur dhe 150 të tjerë janë ndarë nga familjet – thotë UNICEF, që ka ngritur edhe qendra për të ndihmuar minorenët e pashoqëruar. Llava u ndal afër distriktit Buhene, në periferi të Gomas, duke djegur me qindra shtëpi e madje edhe ndërtesa të mëdha. Përpjekjet e rindërtimit tani me gjasë do të kërkojnë disa muaj. Në fakt që më 10 maj ishte paralajmëruar se aktiviteti sizmik në Niragongo ishte rritur. Vitin e kaluar, ekspertët thanë se liqenet e llavës së vullkanit ishin mbushur shpejt duke shtuar shanset për një shpërthim në vitet e ardhshme. Por ata edhe paralajmëruan se një tërmet do të mund ta shkaktonte katastrofën më herët. Shpërthimi më vdekjeprurës i vullkanit ka qenë në 1977, kur mbi 600 persona humbën jetën.